feci circa collum pallam; indui me superariam albam;
supra induo paenulam;
processi de cubiculo cum paedagogo et cum nutrice salutare patrem et matrem;
ambos salutavi et osculatus sum; et sic descendi de domo.
Eo in scholam. introivi, dixi:
Ave magister, et ipse me osculatus est, et resalutavit.
porrexit mihi puer meus scrinarius tabulas, thecam graphariam, praeductorium.
loco meo sedens deleo. praeduco ad praescriptum;
ut scripsi, ostendo magistro; emendavit, induxit;
iubet me legere. iussus alio dedi.
edisco interpretamenta, reddidi. sed statim dictavit mihi condiscipulus.
Et tu, inquit, dicta mihi. dixi ei: Redde primo.
et dixit mihi: Non vidisti cum redderem prior te?
et dixi: Mentiris, non reddidisti. Non mentior.
Si verum dicis, dicto.
inter haec iussu magistri surgunt pusilli ad subductum et syllabas praebuit eis unus de maioribus, alii ad subductorem ordine reddunt, nomina scribunt, versus scripserunt, et ego in prima classe dictatum excepi.
Deinde, ut sedimus, pertranseo commentaria, linguas, artem.
clamatus ad lectionem audio expositiones, sensus, personas.
interrogatus artificia respondi. Ad quem, dixit.
Quae pars orationis? declinavi genera nominum, partivi versum.
